Leikurinn var ekki nema rétt ríflega 2. Mínútna gamall þegar Þorsteinn Daníel Þorsteinsson kantmaður Árborgar átti sendingu inn á teig sem fór í hönd varnarmanns Fjarðarbyggðar og arfaslakur dómari leiksins dæmdi víti. Á punktinn fór Almir Cosic og skoraði örugglega úr vítinu.
En gleði Árborgara var skammvinn því aðeins 12 mínútum síðar jafnaði Stefán Eysteinsson með laglegu marki, en hann hamraði boltann í netið utarlega úr teignum. 1-1 og allt í járnum.
Eftir markið voru gestirnir sterkari og pressuðu varnarlínu Árborgar ofarlega sem gerði það að verkum að miðverðir Árborgar spörkuðu boltanum ansi oft langt og hátt eins og Jamie Carragher er von og vísa. Austanmenn komust þó ekki í gegnum vörnina og lítið var um færi en nóg um pústra og að því er virtist brot og flautaði dómarinn hipsumhapp á brotin og að því er virðist algjörlega eftir hentugleik hverju sinni. Heilt yfir var Fjarðarbyggð betri í fyrri hálfleik og hefðu með réttu átt að nýta yfirburði sína og ná inn marki.
Einar Jónsson þjálfari Árborgar hefur væntanlega látið vel í sér heyra í hálfleik því liðið kom mun öflugra til leiks eftir hléið. Þeir pressuðu betur og héldu boltanum vel, sérstaklega var gaman að sjá ungu strákana Þorstein Daníel og Ingva Rafn sem báðir eru í láni frá Selfossi spila vel. Jón Auðunn og Almir voru líka duglegir í að halda spilinu uppi. Lítið var þó um góð færi en einna helst er að taka til aukaspyrnu frá Almir sem sleikti samskeytin utanverð og svo góðan sprett hjá Þorsteini Daníel sem átti svo skot rétt framhjá.
Harka færðist smátt og smátt í brotin og ljóst var snemma að Halldór Breiðfjörð dómari var að missa öll tök á leiknum. Hans lausn var að flauta jafnt á bæði lið og jafn vitlaust, þrátt fyrir ótrúlegan fjölda brota gaf hann ekki spjald í leiknum fyrr en hann spjaldaði Jón Auðunn Sigurbergsson fyrir að láta brjóta á sér. Næsta spjald sem hann gaf var svo álíka glórulaust en það fékk Fannar Árnason leikmaður Fjarðarbyggðar sem gerði lítið til að verðskulda það. Botnin tók þá úr á 80. Mínútu þegar Jakob Björgvin Jakobsson fékk beint rautt fyrir að fara í tæklingu og vinna boltann. Vissulega var tæklingin hröð en aðeins ein löpp var á undan Jakobi og ekki sýndi hann sólann. Glórulaus ákvörðun og í takt við annað sem dómarinn gerði í leiknum. Ekki er þó hægt að segja að leikurinn hafi fjarað út eftir þetta. Árborgara gáfu í staðráðnir í að ná öllum stigunum sem í boði voru og títtnefndur Jón Auðunn slapp í gegn skömmu eftir þetta en ákvað að reyna að vippa boltanum yfir góðan markvörð Fjarðbyggðar sem greip boltann léttilega.
Manni fleirri gat þó Fjarðarbyggð lagt meira í sóknina og síðustu mínúturnar fóru að miklu leyti fram á vallarhelmingi Árborgar. Gestirnir náðu þó ekki að skapa mörg færi fengu ótrúlegan fjölda af aukaspyrnum sem Andy Pew miðvörður Árborgar skallaði allar í burtu og í lok uppbótartíma átti leikmaður Fjarðarbyggðar hörkuskot fyrir utan teig sem virtist vera að stefna í netið alveg upp við stöng en Steinar markvörður Árborgar sýndi stórbrotna markvörslu og sló boltann í horn.
Jafntefli var sanngjörn niðurstaða í baráttuleik, Fjarðarbyggð er eftir leikinn í 5. Sæti þrem stigum frá 2. sætinu en Árborg er situr sem fastast í 11. sæti.
Áhorfendur: 84
Dómari Halldór Breiðfjörð skelfilegur.
Aðstæður: kjöraðstæður til fótbolta en völlurinn nokkuð harður og hraður.
Maður leiksins Andy Pew Árborg. Öruggur í sínum aðgerðum og tapaði ekki skallabolta allan leikinn
Aðdáendur okkar á Facebook
Nýtt á spjalli
-
Nýlegar færslur
Nýlegar athugasemdir
- Ólafur við Hörkuriðill í sumar
- Brynjar Þór við Árborg mætir Víði í bikarnum
- Jakob við Upphitun: Árborg – Völsungur
- Jakob við Upphitun: Dalvík/Reynir – Árborg
- Tarfurinn við Árborg – KB í kvöld