Árborg - Sindri - Knattspyrnufélag Árborgar

Fréttir og tilkynningar

Bjarnarleik frestað
Árborgarmenn hafa gert Birninum Bjarnagreiða með því að samþykkja frestun á leik liðanna sem fram átti að fara í kvöld, föstudaginn 4. júní.

Adólf fær UEFA B gráðu

Knattspyrnufélag Árborgar óskar þjálfaranum til hamingju með áfangann enda frábært fyrir félagið að vera með á sínum snærum þjálfara með UEFA B þjálfara gráðu.

Nánar um frétt

Leikskýrsla

Árborg - Sindri
Selfossvelli fimmtudaginn 2. júlí

Arnar skildi Sindramenn eftir í sárum.

Árborgarar tóku á móti Sindramönnum á gervigrasvellinum á Selfossi fimmtudaginn 2. júlí og var flautað til leiks kl. 18:00 að staðartíma. Ljóst var fyrir leikinn að Árborgarmenn voru komnir með bakið nánast uppað vegg eftir slælega fyrstu umferð í A-riðli 3. deildar. Ekki þarf svo að minnast á frammistöðuna í fyrsta leik annarar umferðar í Þorlákshöfn þar sem ekki mátti finna feitan hest fyrir Árborgara til að ríða á og því var ferðin ein allsherjar niðurlæging.

En formaður félagins og þjálfarar settust á rökstóla* og fundu út hvað þyrfti til að menn færu að girða sig í brók. Formaður breytti sér í kokk, skundaði í Selið með fullar hendur af grænmeti og eldaði dýrindis grænmetissúpu fyrir leikmenn, þjálfara og stjórnarmenn. Súpan bragðaðist vel og eftir góða ræðu Adolfs vissu menn hvað þyrfti að gera til að komast á sigurbraut á ný.

Hesta Jói skrifar frá Selfossvelli:

Þegar flautað var til leiks var aðeins eitt lið á vellinum og voru það hvítklæddir Árborgarar. Leikmenn töluðu mikið saman, voru grimmir í návígjum og voru greinilega með blóðbragð í munni. Sindramenn voru eins og getið var til um í upphitun, líklega byrjaðir að hugsa um humar og bjór á humarhátíð sem hefst í dag (föstudag 3. júlí). Ekki þurfti að bíða lengi eftir fyrsta markinu en það kom eftir góðan undirbúning á hægri kanti þar sem fyrirgjöf kom fyrir markið og þar var það hinn smái en knái Arnar sem stökk manna hæst og skallaði að marki. Markvörður Sindramanna varði mjög vel en Arnar var ekki hættur og fylgdi vel á eftir, hirti frákastið af sofandi varnarmönnum Sindra og setti boltann í markið. Markinu var vel fagnað en menn voru langt frá því hættir.

Boltinn var meira og minna inná vallarhelmingi Sindramanna sem áttu í vök að verjast, Halli átti gott skot rétt yfir markið á 15. mínútu og annað mark var ekki langt undan. Það kom á 17. mínútu eftir að Böðvar hafði unnið boltann af miklu harðfylgi út við hliðarlínu hægra megin, boltinn barst á Jón Auðunn sem var snöggur að hugsa og sendi boltann rakleiðis áfram út kantinn á Tedda sem skeiðaði upp völlinn. Teddi sendi fyrir og enn á ný var það Arnar hinn smávaxni sem stökk manna hæst og stangaði boltann í netið ! Glæsilega gert og var þessi sókn einstaklega vel útfærð, sem og margar aðrar hjá liðinu í leiknum.

Sindramenn reyndu hvað þeir gátu að sækja fram en allt strandaði á styrkri vörn Árborgarmanna þar sem þeir Gauji, Stefán, Jakob og Óli voru fastir fyrir. Hafði Steinar ekki mikið að gera í markinu fyrir vikið. Fyrri hálfleikur hélt áfram á sömu braut en Árborgarmenn náðu ekki að skora fleiri mörk þegar ágætur dómari leiksins flautaði til fyrri hálfleiks. Skundað var í Tíbrá þar sem boðið var uppá vínarbrauð, kaffi og djús fyrir vallargesti. Síðari hálfleikur fór nokkuð rólega af stað en ljóst var að Sindramenn voru ekkert mættir til að minnka muninn (eða muna minkinn). Á 55. mínútu braust GÁB einn í gegn og var kominn einn gegn markverði, hann sá útundan sér að Teddi var í betra færi og sendi boltann á hann, Teddi tók kannski aðeins of mikinn tíma í að skjóta og markvörður Sindramanna varði skotið. Teddi passaði sig svo á því að klúðra ekki mínútu síðar þegar slök markspyrna Sindramarkvarðar dreif ekki yfir miðju, boltinn var skallaður fram á Jón Auðunn sem tók hann niður, hélt varnarmönnum frá sér og sendi til hægri á títtnefndann Tedda sem setti boltann núna bara í samskeytin. 3-0 og öll mörkin hvert öðru glæsilegra.

Á 63. mínútu kom fyrsta skiptingin þegar Einar Ingi kom inná fyrir Halla sem þýddi að Arnar fór á miðjuna, Einar í bakvörðinn og Gauji á kantinn. Á 73. mínútu fullkomnaði Arnar þrennuna eftir skemmtilega "sókn". Sindramenn voru eitthvað að brasa við að sækja aldrei þessu vant en það endaði með því að Steinar greip boltann. Hann þrumaði honum hátt og langt yfir á vallarhelming Sindramanna þar sem einn varnarmaður þeirra gerði sig líklegan til að skalla frá. Hafþór, nýkominn inná fyrir Gauja, truflaði hann aðeins með því að minna hann á humarhátíðina og bjórdrykkjuna framundan þannig að boltinn skoppaði áfram. Arnar Freyr var þá kominn á móts við vítateig Sindramanna og vonaðist eftir því að boltinn myndi skoppa yfir markvörðinn þeirra líka, honum varð að ósk sinni og nú voru góð ráð dýr. Arnar þurfti að gefa vel í því boltinn stefndi útaf en drengurinn er sprettharður og langaði í þrennuna, hann náði að sparka í knöttinn áður en hann fór útaf og í markið ! Jahérna hér, glæsileg stoðsending frá Steinari markverði. Þrennan fullkomin og mikill fögnuður braust út meðal leikmanna og stuðningsmanna Árborgar.

Á 80. mínútu var Arnari svo skipt útaf fyrir Sigga Andrés sem skeiðaði inná völlinn. Tveim mínútum síðar kom svo viskubrunnurinn Páll Óli inná fyrir Tedda. Leikurinn virtist vera að fjara út því Árborgarmenn slökuðu aðeins á klónni og Sindramenn föttuðu allt í einu að þeir væru að spila fótboltaleik. Eina almennilega færið sem þeir fengu var þegar leikmaður þeirra spyrnti beint úr aukaspyrnu að marki en Steinar var með allt klárt, skutlaði sér og sló boltann yfir markið. Á 85. mínútu kom svo síðasta skipting Árborgarmanna þegar Simmi kom inná fyrir Jón Auðunn. Undir lok leiksins var GÁB staðráðinn í að sýna listir sínar í breikdansi og skundaði hann út að hliðarlínu (ca. til móts við varamannaskýli Árborgar) þar sem hann hélt boltanum frá Sindramönnum sem gerðu hvað þeir gátu til að hirða hann af honum. GÁB breikaði af miklum móð, féll við, stóð upp, setti á sig grifflur og fiskaði aukaspyrnu. Sindramenn voru ekki hrifnir af dansinum og fékk einn þeirra að líta gult spjald fyrir að sparka boltanum í burtu eftir að flautað var. Aukaspyrnuna tók Ólafur Tryggvi og var sendingin glæsileg, boltinn datt niður á markteig þar sem Siggi var ekki einn og óvaldaður en hann náði skoti á markið, hafði boltinn víst eitthvað viðkomu í Sindramanni á leið sinni þangað. Siggi fékk engu að síður markið skráð á sig og var það vel. Staðan 5-0 og niðurlæging Sindramanna fullkomnuð, stuttu síðar var flautað til leiksloka og er vægt til orða tekið að segja að mikið hafi verið fagnað inní klefa eftir leikinn.

Besti leikur liðsins á tímabilinu hafði litið dagsins ljós og var alveg kominn tími á það. Nú er bara að halda áfram og mæta Létti í næsta leik jafnæstir og ákveðnir og í þessum leik, þá er sigurinn vís, það er næsta víst.

Sagt eftir leik.

Steinar markvörður: ,,Ég átti stoðsendinguna á Arnar í fjórða markinu, ekki Hafþór."

SMS skilaboð kveldsins átti svo Adolf þjálfari þegar hann sendi eftirfarandi á Guðmund Garðar sem er á enn einu mótinu á Akureyri: ,,Númer 8 skoraði þrennu í leiknum í 5-0 sigri." Ekki hefur borist svar frá Guðmundi vegna þessa.

*Leðurklæddir stólar með nokkuð háa fætur og stutt bak sem þó styður vel við mjóbakið.

Deila á Twitter Deila á Facebook

Til baka