Næst skal leikið við Sindra frá Hornafirði, nánar tiltekið Höfn í Hornafirði.  Hesta Jói (sem er margbreytilegur persónuleiki) man eftir skottúr þangað frá Selfossi fyrir nokkrum árum síðan, en með í för var Guðjón nokkur Hálfdánarson sem mun nú víst vera í fyrsta sinn í byrjunarliði hjá Árborgurum.  Er honum óskað innilega til hamingju með það.  En hverjum er ekki sama um þessa ágætu ferð, nú skal rætt og ritað um leikinn sem í hönd fer.
 

UMF Sindri (eða Snidri eins og einn ágætur Selfyssingur myndi bera þetta fram) var stofnað árið 1934 er humarveiðibáturinn Sindri HÖ hélt til hafnar eftir góða humarveiði.  Hafði komið fótbolti í eitt veiðibúrið og því varð ekki aftur snúið, íþróttafélagið var stofnað med de samme.  Það var þó ekki fyrr en árið 1965 sem það tókst að koma almennilegu lofti í fótbolta þennan og þá var haldið suður á bóginn til að taka þá í Íslandsmóti í knattspyrnu.

Þessi lið hafa mæst tvisvar sinnum áður á þessari leiktíð, fyrst í Deildarbikarnum á Selfossvelli (sem reyndar var heimaleikur Sindra) þar sem Árborgarar sigruðu 2-0 og síðar í 2. leik tímabilsins á Hornafirði þar sem Sindramenn báru sigurorð af sprækum Árborgarmönnum 2-1.  Í þeim leik var það helst léleg nýting dauðafæra leikmanna og stuðningsmanna Árborgar og stórbrotinn leikur markmanns Hornfirðinga Denis Cardaklija (sem ku engin hornkerling vera) sem olli því að eitt mark var uppskeran þann daginn.

Um næstu helgi halda Hornfirðingar humarhátíð og því er það einlæg ósk undirritaðs að leikmenn Sindra (Snidra) verði með hugann við humarát og bjórdrykkju í leiknum.

Mjög líklegt byrjunarlið í leikkerfinu 3-5-2 er:  Arnar á bara eftir að spila í markinu, hann verður því þar að þessu sinni, GÁB libero, Teddi og Jón Auðunn étarar, Böðvar og Halli Jóh á sama kanti, Jakob frammi, Stefán djúpur og mjög varnarsinnaður, Óli Tryggvi og Gauji fá svo frjálst hlutverk á vallarhelmingi Sindramanna, Steinar mun svo veita Jakob andlegan stuðning frammi.

Það skal tekið fram að leikurinn hefst kl. 18:00 en áður auglýstur tími var kl. 20:00.

Að lokum þetta:  Leyfið Árborgarhjartanu að slá og þá er sigurinn vís.

Baráttukveðjur, Hesta Jói