Árborg tekur á móti Aftureldingu frá Mosfellsbæ á Selfossvelli, laugardaginn 9. júlí kl. 14:00.
Árborg og Afturelding hafa einu sinni mæst áður, það var í deildarbikarnum í vor þar sem Mosfellingar unnu 2-0 sigur. Tengingin á milli klúbbanna er lítil. Tveir leikmenn hafa spilað fyrir bæði lið. Gunni Borgþórs var í sjö ár í Mosfellsbænum og á yfir hundrað leiki fyrir félagið. Þá var Steini markmaður í herbúðum Aftureldingar 2001 og 2002 og lék svo í þrjú ár með Hvíta riddaranum. Jói III, sem lék með okkur vorið 2006, er uppalinn í Aftureldingu. Einn Sunnlendingur er í liði Aftureldingar, Snorri Helgason Jóhannessonar frá Hvammi 2 í Hrunamannahreppi. Afi hans er toppnáungi – og sjálfsagt Snorri líka.
Gengi liðanna í 2. deildinni í sumar hefur verið töluvert ólíkt. Reyndar er gengi flestra liða ólíkt gengi okkar. Taplausir í síðustu fimm leikjum hafa Mosfellingar lyft sér upp í 5. sæti deildarinnar með 17 stig og eru nú skammt frá toppnum. Árborg er hins vegar á botninum með 5 stig. Markahæsti leikmaður þeirra, Arnór Þrastarson, hefur skorað fjögur mörk.
Úrslit liðanna í síðustu fimm leikjum í deildinni:
Árborg: J-T-T-J-T
Afturelding: S-S-J-S-S
Flautað verður til leiks kl. 14:00 en maðurinn með flautuna er KR-ingurinn Vilhjálmur Alvar Þórarinsson. Honum til aðstoðar eru Eyjapeyjinn og fréttahaukurinn Júlíus Ingason og Þorlákshafnar-Þórsarinn Magnús Garðarsson. Varadómari er Guðmundur Ársæll Guðmundsson, sem dæmir fyrir Huginn á Seyðisfirði.
Veðrið á leikdag verður í boði Bónus, svokölluð bongóblíða, en gert er ráð fyrir glaðasólskini, hægri norðaustan átt og 16 stiga hita.
